Hermeniekes on tour                                  

Vastelaovendjdieënsdig trékke d’r weer (Wieërter) kepèlle, zate hermeniekes en slaagwêrkgroepe doeër de binnestad.  Ze gaon van kefee nao kefee, spuuële óngerwieëg mer gaon ouch de kefees in um meziek te make. D’r keumtj weer tamtam in Wieërt op Vastelaovendjdieënsdig want dét wore vae efkes kwiêt.

In 1975 kwome Vorst Jan (Coenen) en Bert Adriaens mét ’t idee um inne binnestad in plaats vanne Rogstaekerstocht ’n Hermeniekesfestival te organizieëre. Meziek mocht, hoofdje neet, as d’r mer herrie woor. De ideejekemissie wêrkdje ‘t gehieël oet en in 1976 woor ’t zoeë ver en vóng ’t ieërste Hermeniekesfestival plaats. De naam vónge ze toch wat te Hollands en vanaaf 1980 ésj toen ’t Toêt- en Blaosfieëst gewoeëre. De herrie maakdje plaats vör geweldjige meziek, ’t woor ’n evenemênt waat neet mieër wég te dînke woor inne Wieërter Vastelaovendj.Völ jaore wore d’r daen dieënsdig völ minse en meziekgezelschappe oppe straot, hieël Wieërt fieëszje. De tiêd verângerdje, de minse verângerdje en d’r mós wat nows kaome. Roond 2010 krieëge ve de Slaag umme Mêrrentj. ’n Geweldjige happening mét meziek en zânk mer te prefesjenieeël en neet echt mieër wat van Wieërt zelf. Op e memênt woor ouch dit meziekspektakel weer verdwene en kwoom d’r zânk mét prefesjenieeël lîcht, geluid, podia enne overdékdje mêrrentj. Kepèllemeziek woor neet mieër. Tot d’r in 2017 înkel kepèlleminse aanne stamtaofel zote en in eur gedachte trök ginge nao vreuger.

Trök nao de Wieërter vastelaovendj-roots. Vanaaf 2018 neume vae ‘t Vastelaovendjdieënsdigspektakel inne binnestad Hermeniekes on tour. Tieën tot twîntjig meziekgezelschappe kaome beejeîn en hoeëpe de minse ouch weer oppe bein te kriege. D’n daâg startj mét kinnesmake, beejkalle, brunche en dan same înkel nummers inblaoze. Det doon ve allemaol inne Tramhalt.

Daonao vertrékke de meziekgezelschappe eîn vör eîn verschillendje kânte de binnenstad in, make ze óngerwieëg meziek en gaon ze op wieëg nao ‘t vuuëraaf aangegaeve kefee. Dao vermake ze same mét nog ’n meziekgezelschap ’n oor lang de minse. Nao det oor vertrékke ze volges ‘n vuuëraaf geplandje route nao ’t volgendje kefee. Neteurlik weer óngerwieëg meziek en in ’t volgendje kefee kaome ze weer ’n ânger muziekgezelschap tieëge woeë ze weer same meziek mét make. Zoeë toeëre ze roond inne binnestad, és d’r meziek en tamtam oppe straot en inne kefees en roond viêf oor kaome alle kepèlle beejeîn oppe mêrrentj woeë ze aansloête beej ’t Rogstaekersevenemênt en spuuële ze allemaol same tegeliêk drej nummers oonger aanveuring vanne geweldjige dirigênt Tjeu Snoek.

Waat e gewêldj, waat geweldjig. Det wildje neet misse.

Gae zeetj d’r toch ouch allemaol beej?